ကိုယ့်ကိုယ်ကို ကျည်တောက်စွပ်ကြည့်ခြင်း

မယုံမရှိနဲ့ ..ကျွန်တော်ခြောက်လလောက် ပြတ်သွားဖူးတယ်…။

ကျွန်တော်ငယ်ငယ်တုန်းက သူငယ်ချင်းတွေနဲ့အတူ.. ငှက်ပျောတောဆိုတဲ့ ကျေးရွာကို အလည်သွားခဲ့တယ်..။ ငှက်ပျောတောကျေးရွာဆိုတာ မြောင်းမြမြို့နယ်ထဲမှာပဲရှိတဲ့ကျေးရွာလေးပါ..။ ကရင်တိုင်းရင်းသားတွေချည်းပဲ နေထိုင်လို့ကရင်ရွာလို့ ပြောလို့ရပါတယ်။ အဲဒီရွာက အစ်မကြီးတစ်ယောက်က ကျွန်တော်တို့လမ်းမှာနေပြီး ကျောင်းလာ တက်တဲ့အတွက် ကျွန်တော်တို့နဲ့ရင်းနှီးပြီး ရွာကိုအလည်လိုက်ဖို့ခေါ်တယ်။ သူရွာပြန်တော့ ကျွန်တော်တို့လည်း လိုက်သွားကြတာပေါ့…။

          ဟိုရောက်တော့ ပျော်လိုက်တာဗျာ..။ ကောက်ရိုးပုံတွေမှာ ကျွမ်းထိုးကြ… ချွေးတွေသံတွေနဲ့ တစ်ကိုယ်လုံးယား ယံပြီးတော့ အနီကွက်တွေထ..။ ချောင်းထဲခုန်ချ၊ ရေကူးကြ၊ ဓနိသီးတွေခူးစားကြ၊ အုန်းသီးတွေစားကြ၊ ထန်းသီးတွေ စားကြ၊ ချောင်းထဲမှာ လှေတစ်စီးနဲ့ လျှောက်သွားကြ၊ လမုသီးတွေ ခူးစားကြ၊ ခါချဉ်ကိုက်လို့ အူယားဖားယားရေထဲခုန်ချ၊ အိမ်ကိုပြန်တဲ့လမ်းမှာ ရေနွေးကြမ်းလေး သောက်ပါဦးဆိုပြီး ဟိုအိမ် ဒီအိမ်ကခေါ်တာကြောင့် အားနာပါးနာနဲ့ ခေါ်တဲ့အိမ်တိုင်းဝင်ပြီးတော့ ရေနွေးကြမ်းသောက်၊ ထန်းလျက်၊ ကြံသကာစားကြနဲ့ ပြန်ရောက်တော့ အိမ်ရှင်ကျွေးတဲ့မုန့်တွေစားကြ၊ (အင်း…ရေးရင်းနဲ့ ဗိုက်တော်တော်တင်းလာပြီ) တစ်နေ့လုံး စားကြသောက်ကြ၊ လျှောက်သွားကြဆိုတော့ ညရှစ်နာရီ မထိုးသေးဘူး အကုန်လုံး အိပ်ရာထဲ တခေါခေါ ဟောက်နေကြပြီ..။ ကျွန်တော်တို့ကိုခေါ်လာတဲ့ အစ်မကြီးလည်း ဘယ်အီသီယိုးပီးယားက မျောက်တွေခေါ်လာသလဲ ဆိုပြီး အဆူခံရမှာကျိန်းသေတယ်.. ဟီးဟီး….။

          နောက်နေ့မနက်ကျတော့ အစ်မကြီးက အိပ်ရာကနှိုးပြီး “အလှူရှိတယ်.. သွားကြမယ်” ဆိုတာနဲ့ ကျွန်တော်တို့ စူဇကာအုပ်စုလည်း ကမန်းကတန်းအိပ်ယာထ၊ မျက်နှာသစ်သွားတိုက်ပြီး အလှူအိမ်ရှိရာကို ချီတက်လာခဲ့ကြတယ်။ အလှူအိမ်ကလည်း တော်တော်ဝေးဝေးဗျာ.. လယ်ကွင်းထဲကနေ ဖြတ်သွားရတာ..။ လမ်းလျှောက်ရတာ ခြေထောက် တွေနာ..။ ချွေးတွေကပျံနဲ့.. တော်တော်လေး ပင်ပန်းတယ်ဗျာ..။ ဒီလောက်ပင်ပန်းတာတောင် ကျွန်တော်တို့တွေ စပါးနု (စပါးအဖြစ်မရောက်သေးတဲ့ စပါးပင်ထဲက စပါးစေ့နုနုလေး)တွေ နှုတ်စားကြ။ ပြောင်းဖူးခင်းတွေ့လို့ ၀င်ချိုးပြီး အစိမ်းလိုက်ကိုက်စားကြနဲ့ အခွင့်အရေး ကို ပြည့်ပြည့်၀၀အသုံးချလိုက်ကြပါသေးတယ်..။

 ဒီလိုနဲ့ အလှူအိမ်ကိုရောက်တော့ မိုးပြဲဒယ်အိုးကြီးမီးဖိုခွင်ပေါ်တင်ထားတာကိုတွေ့လိုက်ရတယ်.. အထဲမှာတော့ ရေတွေထည့်ထားတယ်.. ရေနွေးအိုးတည်နေတယ်ထင်ပါ့..။ ရေနွေးကလည်း မိုးပြဲဒယ်နဲ့ တောင် တည်ရသလား။ ဘယ်လောက်တောင်သောက်ကြမှာလဲမသိ။ သြော် .. တောသူတောင်သားတွေ ဆိုတော့လည်း မြို့မှာလို အချိုရည်တွေဘာတွေ အလွယ်မရတော့ ရေနွေးပဲအဓိကထားတည်ခင်းဧည့်ခံ ရမှာပဲလေ.. ဒီလောက်တော့ရှိမှာပေါ့။

အဲဒီရေနွေးအိုးရဲ့ဘေးမှာတော့ ၀က်ကြီးတစ်ကောင် အိပ်နေတယ်ခင်ဗျ.. သြော်..အလှူရှင်တွေ ကလည်း စားစရာ၊ သောက်စရာလုပ်နေတဲ့နေရာမှာ ၀က်ကိုလာထားရသလား.. ခက်တာပဲ..။ ဒီလောက်ကျယ်တဲ့မြေကိုဗျာ.. သစ်ပင်တစ်ပင်ပင်မှာ ကြိုးသွားချည်ထားလိုက်တာမဟုတ်ဘူး..။ အခုတော့ လူတွေက ဒီဝက်ကိုရှောင်ကွင်းသွားလာနေရတယ်။

ကျွန်တော်လည်း ဒါတွေခဏထားလို့ ရွာသားတစ်ယောက်နဲ့စကားပြောနေတဲ့ ကျွန်တော့်တို့ရဲ့အစ်မ ကြီးကို လက်ကုတ်မေးလိုက်တယ်.. “ဘာကျွေးမှာလဲ”..လို့။ အစ်မကြီးက ခပ်တိုးတိုးပြန်ဖြေတယ်…။ “၀က်သား” တဲ့။

သိတယ်လေ..။ သိနေတယ်..။ ကျွန်တော် လျှာကိုသပ်လိုက်တယ်.. စားရချည်သေးရဲ့..။ ၀က်သားဆို ကျွန် တော်သိပ်ကြိုက်တာလေ..။ ကျွန်တော်လည်း ငူငူငိုင်ငိုင်ထိုင်နေကြတဲ့ သူငယ်ချင်းတွေကို ၀က်သားဟင်းနဲ့ ကျွေးမည်ဖြစ် ကြောင်း ခပ်တိုးတိုးအသိပေးလိုက်တယ်..။ ဘာပြောကောင်းမလဲ…အကောင်သေးရင်ပါးစပ်ထဲမောင်းသွင်းမယ့် ငနဲသားတွေ လက်သီးလက်မောင်း ထတန်းလိုက်ကြလေရဲ့။ .. နိပ်ဟ ပေါ့..။

အဲဒီအချိန်မှာ အလှူရှင်ထွက်လာတယ်… ကျွန်တော်တို့ကိုကြည့်ပြီး..

“သြော်… မြို့ကဧည့်သည်တွေပါတာကိုး.. အိမ်ထဲဝင်ထိုင်ကြလေဝေ့..ဟင်းက ဘာမှမလုပ်ရသေး ဘူးကွယ်.. ခဏစောင့်ကြနော့်..”လို့ဆိုတော့  ကျွန်တော်တို့အုပ်စုလည်း အိမ်ပေါ်ကိုတက်ဖို့ ပြင်ကြပါ တယ်..။ အဲဒီအချိန်မှာ…

ဆူဆူညံညံအသံကြားတာနဲ့ ကျွန်တော်တို့တွေ လှမ်းကြည့်လိုက်မိကြတယ်.. ခုနက  အိပ်နေတဲ့ဝက်ကို လူနှစ်ယောက်က ကြိုးနဲ့ဆွဲတော့ ၀က်က ထအော်တဲ့အသံပါ။ အင်း… ၀က်ကို တစ်နေရာရာကို ပြောင်းထားတော့မယ် နဲ့တူတယ်.. ဒီလိုမှပေါ့..ဆိုပြီး တွေးနေတဲ့ကျွန်တော့်အတွေး မဆုံးခင်မှာပဲ…

ရွာသားတစ်ယောက်ဟာ လူနှစ်ယောက်ဆွဲထားတဲ့ဝက်ကို ရဲဒင်းတစ်လက်နဲ့ ထုချလိုက်ပါတော့ တယ်…။ အသွားနဲ့ မခုတ်ဘဲ အသွားရဲ့တစ်ဖက် ဒင်နဲ့ထုချလိုက်တာပါ..။ ၀က်ကြီးရဲ့ခေါင်းမှာ သွေးတွေဖြာခနဲ ထွက်သွားတာကို ကျွန်တော်တို့အားလုံး ကြက်သေသေပြီး ကြည့်နေမိပါတယ်။ ကြည့်နေတုန်းမှာပဲ..တအီအီညည်းညူနေတဲ့ဝက်ကြီးကို နောက်ထပ်ရဲဒင်းနဲ့ နှစ်ချက်.. သုံးချက်…ဆင့်ကာ ဆင့်ကာ…..

ဒါ..ဒါ ဘာလုပ်တာလဲလို့ .. ကျွန်တော်မေးလိုက်တယ်.. ကျွန်တော်တို့ကိုခေါ်လာတဲ့အစ်မကြီးလည်း မျက်နှာမှာ  သွေးမရှိတော့သလို ဖြူဖပ်ဖြူရော်ဖြစ်နေတယ်..။ ကျွန်တော်သိလိုက်ပြီ.. ဒါအလှူမှာကျွေးဖို့ ၀က်သတ်တာပဲ…။ ကျွန်တော်တို့တွေ တစ်ဖွဲ့လုံးမျက်စိမျက်နှာပျက်နေပြီ..။  ခေါ်လာတဲ့အစ်မကြီးက ပြောတယ်…။

“ပြန်ကြမယ်…”

သူ့စကားကို ဘယ်သူမှ မကန့်ကွက်ပါဘူး.. အကုန်လုံး တိတ်ဆိတ်စွာနဲ့ အလှူအိမ်ကနေ ပြန်လာကြပါတော့ တယ်။ မမြင်ရရင်တော့ ကျွန်တော်တို့တွေ ၀က်သားဟင်းနဲ့ထမင်းကို မြိန်ရည်ယှက်ရည် စားမိကြမှာပါပဲ..။ အခုတော့ ကိုယ့်မျက်စိရှေ့မှာတင် သတ်နေတာကိုတွေ့ရတော့ ဘယ်လိုမှ စားလို့မျိုကျမှာမဟုတ်တော့ဘူး..။ အပြန်လမ်းမှာ ခေါ်လာတဲ့အစ်မကြီးက လာမိတာမှားတယ်လို့ပြောတယ်။ အကုန်လုံးခေါင်းညိတ်ကြတယ်… ဘယ်သူမှအသံထွက် မလာကြဘူး..။ အားလုံးရဲ့ရင်ထဲမှာ စိတ်မကောင်းခြင်းတွေ ကြီးစိုးနေမယ်ဆိုတာ ကျွန်တော်ယုံကြည်တယ်။ ကျွန်တော် လည်း တစ်လမ်းလုံး ရဲဒင်းနဲ့ထုပြီး အသတ်ခံရတဲ့ ၀က်ကြီးကိုမျက်စိထဲမြင်ယောင်ပြီး ဘယ်လိုမှစိတ်ထဲမကောင်းဘူး ဗျာ...။ ကျွန်တော်တို့အဖြစ်က ဒီဝက်ကြီးသေပွဲဝင်ရမှာကို ပျော်ပျော်ကြီးလာကြည့်မိသလိုဖြစ်နေတယ်..။ ဒီလိုနဲ့ ကျွန်တော်တို့တွေ အသွားမှာ ပျော်ပျော်ရွှင်ရွှင်နဲ့ဆူညံနေသလောက် အပြန်လမ်းမှာတော့ ကိုယ်စီအတွေးတွေနဲ့ နှုတ်ဆိတ်နေမိသည်မှာ အိမ်ပြန်ရောက်သည်အထိ ..။

ဈေးတွေဆိုင်တွေမှာ ၀က်သားအဖြစ်နဲ့ရောင်းချခံနေရတဲ့ ၀က်တွေလည်း ဒီလိုနည်းလမ်းတွေနဲ့ အသတ်ခံ၊ အသေခံနေကြရတာပဲ ဖြစ်မယ်ဆိုတဲ့အတွေတွေက ကျွန်တော့်ရဲ့ရင်ထဲမှာ ဘယ်လိုမှမေ့ပျောက်လို့ ရနိုင်တော့မှာ မဟုတ်ဘူး။ ဒါကြောင့် ကျွန်တော် စိတ်ပိုင်းဖြတ်လိုက်တယ်..။ ၀က်သားဟင်း ဘယ်တော့မှမစားတော့ဘူး..။ တတ်နိုင်သမျှ ရှောင်မယ်။ အိမ်ကချက်ရင်လည်း မစားဘူး.. ။ ဟင်းမရှိရင် ဆီနဲ့ဆားနဲ့စားမယ်..။ ဒီလိုနဲ့ပဲ ကျွန်တော်ဝက်သားဟင်းပြတ်သွားပါတယ်။ သိတယ်မလား .. ကျွန်တော့်စိတ်ဓာတ်က ခပ်မာမာနဲ့ဆိုတော့ ခြောက်လလောက်လည်း ကြာရော အိမ်ကချက်တဲ့တစ်နေ့ ဘယ်လိုမှ မနေနိုင်တော့ဘူး…။ ပန်းကန်ထဲက ၀က်သားဟင်းနံ့ကို ကျွန်တော်ဘယ်လိုမှ ခုခံနိုင်စွမ်း မရှိတော့ဘူး။ ဟင်းပန်းကန်ထဲက ၀က်သားပိုင်ရှင်ဝက်ကြီး ဘယ်လိုသေခဲ့ရတယ်၊ ဘယ်လိုအသတ်ခံခဲ့ရ တယ်ဆိုတဲ့ အတွေးတွေလည်း ကျွန်တော့်ရင်ထဲကနေ ဘယ်လိုထွက်ပြေးသွားမှန်း မသိလိုက်တော့ဘူး။ ဒါကြောင့် နှစ်ပန်းကန်လောက် ဆွဲပစ်လိုက်တယ်။...။ ဒီလိုနဲ့ ကျွန်တော့်အဓိဋ္ဌာန်လည်း ပျက်သွားပါ တော့တယ်..။ ပေါက်တဲ့နဖူးမထူးပြီမို့ ကျွန်တော်လည်း ၀က်သားကို မရှောင်တော့ဘဲ ပြန်စားလိုက်တာ ဒီနေ့ထိပါပဲဗျာ….။

အဲဒါကြောင့်လူကြီးသူမတွေကပြောကြတာ…ဘာမြှီးကိုကျည်တောက်စွပ်ဆိုလားပဲ..။

ဒါပေမယ့်…မယုံမရှိနဲ့ဗျ…

ကျွန်တော် ၀က်သားဟင်း ခြောက်လလောက်တော့ ပြတ်သွားဖူးတယ်…။

                                                          

                                                                       ရဲရင့်ကိုကို                        (15.8.2.12) 2:00 AM

လာရောက်ဖတ်ရှုကြတဲ့ သူငယ်ချင်းများကို ကျေးဇူးအပုံကြီးတင်ပါတယ်ဗျားး...။